टेण्डर दर्ता गर्न खोज्दा खुकुरी हानाहान , म्यादी प्रहरीको भागाभाग...

दमौलीः गिटी ढुंगा निकासीको टेण्डर दर्ता गर्ने क्रममा दमौलीमा दुई युवा समूहबीच झडप भएको छ। दमौली खुला मैदानमा भएको घटनामा केही युवा घाइते भएका छन्। कोत्रेको गिटी बालुवा निकासीका लागि टेण्डर खुलाइएकामा फारम भर्न जाने क्रममा एक समूहले अर्को समूहलाई निषेध गर्दा झडप भएको हो। कोत्रेका युवाले गाछेपानीका युवाहरुलाई फारम दर्ता गर्न नदिँदा झडप भएको श्रोतको दाबी छ। प्रहरीले घटनामा संलग्नताको आशंकामा एक कारमा दमौलीबाट फर्कंदै गरेका केही युवाहरुलाई पक्राउ गरेको छ। यसैगरी दमौलीका केही युवाहरु समेत प्रहरीको नियन्त्रणमा छन्। प्रहरी निरीक्षक विजयराज पण्डितले घटनाका बारेमा अनुसन्धान भइरहेको जानकारी दिनुभयो। दुवै समूहका युवाहरुले खुकुरीसहित भिडन्त गरेका थिए । त्यसक्रममा दुवै समूहका युवाहरु घाइते भएको अनुमान प्रहरीको छ । प्रहरी नियन्त्रणमा पर्नेमा एक युवा घाइते छन्। घटनाका प्रत्यक्षदर्शी किशोर पन्तका अनुसार भिडन्तपछि युवाहरु खुकुरी देखाउँदै मोटरसाइकल तथा कारमा भागेका थिए । युवाबीच थप झडप हुन लागेपछि स्थानीयले हस्तक्षेप गरेका थिए।

म्यादीको भागाभाग
घटनास्थल खुला मैदान नजिकै म्यादी प्रहरी भए पनि युवाबीचको हिंसात्मक झडपपछि म्यादी प्रहरी भागेका थिए। चुनावी सुरक्षा व्यवस्थापनका लागि खटाइएको भए पनि म्यादी प्रहरीहरु भागेका र घटनास्थलमा अन्य प्रहरी नपुग्दा झडपमा संलग्नहरु सहजै दमौली बजारबाट बाहिरिएका थिए। यद्यपी प्रहरीले घटनालगत्तै शंकास्पद सवारी साधनलाई नियन्त्रणमा लिन थर्पु, बेलचौतारा तथा मातहतका इकाइमा सूचना गरेको थियो। सोही आधारमा थर्पु प्रहरी चौकील शंकास्पद कारसहितका युवालाई पक्रेको हो । उनीहरुसँग घटनाबारे अनुसन्धान भैरहेको प्रहरी निरीक्षक पण्डितले जानकारी दिनुभयो। दमौलीमा पछिल्लो समय खुकुरी प्रहारका श्रृंखलामा बढ्दै गएका छन्। बजारभित्रका युवाबीच पनि बेला बेला झडप हुने गरेको छ । झडपमै परी केही युवाले ज्यान समेत गुमाइसकेका छन्। बजारका विभिन्न युवा समूहबीच समेत झडप हुने गरेको छ । यसैगरी टेण्डर दर्ताका बेला समेत बल प्रदर्शन गरेर एक अर्कालाई निषेध गर्न खोज्दा बेला बेला झडप हुने गरेको छ।

Labels: समाचार